ភ្នំពេញ៖ ក្រសួងអប់រំបានណែនាំដល់គ្រឹះស្ថានសិក្សា និងអ្នកពាក់ព័ន្ធទាំងអស់ ត្រូវផ្សព្វផ្សាយពីអត្ថន័យត្រឹមត្រូវនៃទិវានៃក្ដីស្រលាញ់ ត្រូវពង្រឹងការអនុវត្តន៍វិន័យ ជំរុញសកម្មភាព «មិត្តអប់រំមិត្ត» និងត្រូវធ្វើទំនាក់ទំនងជាមួយមាតាបិតា អ្នកអាណាព្យាបាល និងសហគមន៍ដើម្បីផ្ដល់និងទទួលព័ត៌មាននានា ពាក់ព័ន្ធនឹងសកម្មភាពមិនប្រក្រតី ដែលប្រព្រឹត្តដោយសិស្សនុសិស្ស ដើម្បីទប់ស្កាត់ កែលម្អសិស្សឱ្យទាន់ពេលវេលា។

ក្នុងសេចក្ដីណែនាំចុះថ្ងៃទី១១ ខែកុម្ភៈ ក្រសួងអប់រំ បានសង្កេតឃើញថា សិស្សនុសិស្សមួយចំនួនតូចយល់ច្រឡំថា ថ្ងៃ១៤ ខែកុម្ភៈ ជាថ្ងៃបុណ្យសង្សារ ឬជាថ្ងៃណាត់ជួបគ្នារវាងគូស្នេហ៍។ យុវជនមួយចំនួនតូចបានប្រព្រឹត្តសកម្មភាពភ្លើតភ្លើន ភ្លេចការសិក្សា បាត់បង់សេចក្ដីថ្លៃថ្នូរបុគ្គលនិងក្រុមគ្រួសារ ប្រាសចាកវប្បធម៌ និងប្រពៃណីជាតិខ្មែរ។

ក្រសួងអប់រំបានលើកឡើងក្នុងសេចក្ដីណែនាំនោះថា៖ «ទិវានេះពុំមែនជាប្រពៃណីរបស់ជនជាតិខ្មែរយើងទេ»។

ក្រសួងបានអំពាវនាវដល់មន្ទីរអប់រំ យុវជន និងកីឡា ខេត្ត គណៈគ្រប់គ្រងគ្រឹស្ថានសិក្សា និងគ្រប់ភាគីពាក់ព័ន្ធ បន្តពង្រឹងបទបញ្ជាផ្ទៃក្នុងសម្រាប់គ្រឹះស្ថានបឋមសិក្សា និងបទបញ្ជាផ្ទៃក្នុងសម្រាប់គ្រឹះស្ថានមធ្យមសិក្សាចំណេះទូទៅសាធារណៈឱ្យមានប្រសិទ្ធិភាពខ្ពស់នាថ្ងៃទី១៤ ខែកុម្ភៈខាងមុខ៕